Погледнете како се реставрирани два павилјона на московскиот изложбен комплекс ВДНХ!

• Ве очекуваме на Телеграм-каналот https://t.me/rb_makedonija
• Вклучете го во пребарувачот „Show notifications“ (дозволи известувања) за нашиот сајт!
• Пријавете се на нашата неделна мејлинг листа

Павилјон „Месна индустрија“  

Имаше две верзии на овој павилјон. Првата беше изградена во 1939 година, но по војната тоа полудрвено здание беше демонтирано. Во 1950-тите зданието беше повторно обновено на ново место во стилот на сталинскиот ампир со елементи на барок и класицизам.

До 1956 година павилјонот се викаше „Главмјасо“ (кратенка од „Главна управа на месната индустрија“), а потоа „Месна индустрија“. На приземјето имаше изложба посветена на достигнувањата на советската месна индустрија, а на првиот кат имаше соба за дегустација, каде што гостите можеа да ги пробаат и да ги купат дефицитарните производи од месните комбинати.

Во 1990-тите изложбата на месната индустрија беше затворена, а самиот павилјон почна да се издава на трговски и други претпријатија.

По реставрацијата, беше одлучено на павилјонот да му се врати атмосферата од педесеттите години. Реставрирани се уникатните керамички ѕидни слики на ентериерот, мермерот на ѕидовите, бронзените лустери, како и керамичката фонтана во една од салите.

Реставриран е и главниот симбол на павилјонот – големата скулптура на бик на покривот. Оригиналот беше направен уште во 1930-тите, но скулптурата беше оштетена при транспортот.

Изгледот на бикот е реконструиран според архивски фотографии, како и орнаментите во форма на бикови на фасадата.

Павилјон „Житарки“

Овој павилјон е трет по висина меѓу сите згради на ВДНХ, само „Космос“ и „Централниот“ се повисоки од него. Тој, како и многу други зданија, неколкупати е реконструиран. Првиот проект „Житарки“ беше урнат во 1938-1939 година.

Во зградата има поставка посветена на производството на житарки и зеленчук во СССР. И оваа изложба беше затворена во деведесеттите, а павилјонот даден за изнајмување. Реставрацијата му ги врати позлатениот шилец висок 3,5 метри и украсната црвена ѕвезда. Повторно е составена од остатоците на старата ѕвезда, пронајдени на таванот на павилјонот и оригиналниот носач.

Патем, една од ретките работи кои се практично целосно сочувани се витражите. Во една од салите реставраторите ги обновија и уникатните слики кои создаваат ефект на отсуство на таван - овој метод често се користел при сликањето замоци и храмови во епохата на Ренесансата. На муралот се прикажани небо со облаци и развени црвени знамиња.

Сега во овој павилјон ќе биде отворена изложба на Московскиот политехнички универзитет.