Како да подготвите сочна кримска пита со месо „кубете“ (РЕЦЕПТ)

• Ве очекуваме на Телеграм-каналот https://t.me/rb_makedonija
• Вклучете го во пребарувачот „Show notifications“ (дозволи известувања) за нашиот сајт!
• Пријавете се на нашата неделна мејлинг листа

Кримчаците - мала, но издржлива етничка група со туркиско-еврејско потекло - се дел од кримската историја речиси пет века. Нивниот идентитет е длабоко поврзан со нивните кулинарски вештини, а во срцето на ова гастрономско наследство е питата наречена „кубете“. Самото нејзино име се преведува како „многу месо“, со што се потенцира клучната улога на оваа состојка во создавањето на незаборавниот вкус и мирис.

Во својата суштина, „кубете“ претставува внимателно обмислена комбинација на состојки. Тенките, проѕирни ребра од кромид ја сочинуваат основата на вкусот, проследени со фини парчиња јагнешко и телешко ситно исечени со остар нож. Оваа техника ја зачувува текстурата на месото. Затоа е важно да се изостават современите помагала како што е машината за мелење.

Една од главните причини за подготовка на ова јадење е празникот на плодноста Дервиза, кој се слави за време на есенската рамноденица на 22 септември. Додека сонцето полека тоне зад хоризонтот, означувајќи го преминот од едно во друго годишно време, семејствата се собираат околу трпезата за да ги прослават времето на жетвата и неуморната работа на селаните. Со секој залак од оваа пита човекот се поврзува со земјата, сведочејќи на тесната врска помеѓу човечката работа и дарежливоста на природата.

Самиот чин на уживање во јадењето „кубете“ станува ритуал. Некогаш одамна оваа пита се сервирала „отворена“ на масата, со горната кора отстранета и исечена на парчиња. Членовите на домаќинството со лажици го фаќале филот богат со вкусови, патем откинувајќи дел од мекото тесто. Тоа било сетилно искуство што ги спојувало семејствата и ја држело заедницата на куп.

Денеска ви предлагам да ги пробате вашите кулинарски вештини и да го подготвите овој вистински специјалитет на кримската кујна.

Состојки:

• Месо (јагнешко, телешко или по избор) - 400-500 g
• Кромид – 2 средни главици  
• Компир - 3 пар.
• Месен булјон - 100-150 ml
• Сол и бибер по вкус
• Оцет - 1 лажица  
• Јак црн чај (за премачување) - 50 ml
• Путер (претходно замрзнат) - 180-200 g
• Павлака – 125 ml (половина шолја)
• Млеко – 125 ml (половина шолја)
• Пченично брашно – околу 3 шолји
• Малку брашно за посипување
• Масло (за подмачкување)

Начин на подготовка:

1. Најпрво подгответе го месото. Со многу остар нож ситно исецкајте го месото по желба. Посолете го и додајте ги зачините по вкус и оставете го на страна.

2. Потоа направете го тестото. Земете чинија, додајте 2 шолји брашно и во него изрендајте го претходно замрзнатиот путер. Со прстите втријте го путерот во брашното додека не добиете ронлива текстура.

3. Додајте ги павлаката, млекото и оцетот. Месете го тестото. На почетокот ќе ви изгледа како премногу да се растура, но не грижете се. Постепено додавајте го остатокот од брашното (околу една шолја) додека тестото не стане мазна еластична маса.

4. Тестото обликувајте го во топка и чувајте го во фрижидер еден час за да се одмори и стегне.

5. Додека тестото мирува, излупете ги и исечете ги компирите на тенки прстени. Исечете го кромидот на прстени или ребра.

6. Загрејте ја рерната на 200°C.

7. Две третини од тестото развлечете во круг малку поголем од тркалезната тепсија во која ќе ја печете питата. Подмачкајте ја тепсијата со масло и внимателно ставете го развиеното тесто на дното.

8. Преку тестото ставете слој кромид (две третини од насечканиот кромид).

9. Потоа врз кромидот ставете слој од тенко исечени компири.

10. Сега е време за главната состојка: зачинетото месо. Рамномерно распоредете го врз компирите. Добро зачинете и посолете. Додадете една третина од насечканиот кромид.

11. Преостанатата третина од тестото расукајте ја со сукало и ставете ја врз месото. Користете ги прстите за да ги залепите рабовите на долната и горната кора за да ја затворите питата.

12. Во средината на горната кора со прсти направете мал отвор.

13. Премачкајте го горниот слој на питата со јак црн чај. Потоа преку отворот ставете главица кромид за да не истекува течноста во текот на печењето.

14. Ставете ја питата во претходно загреана рерна и печете околу 20 минути.

15. По 20 минути внимателни извадете ја питата од рерната. Полека сипете околу 50-70 грама од месниот булјон низ отворот на средината на питата. Вратете ја питата во рерната и продолжете го печењето уште 30 минути. За тоа време питата ќе го впие булјонот и ќе добиете сочно полнење преполно со вкусови. Повторно налејте ја другата половина низ отворот и печете ја питата уште 30 минути.

16. Не грижете се ако вишокот течност почне да тече низ отворот на врвот. Така питата ќе биде уште посочна, а компирот нема да се распадне.

17. Кога питата ќе добие златно-кафена боја и внатрешноста е целосно сварена, извадете ја од рерната и оставете ја да се излади пред да ја исечете и послужите. Пријатен апетит!