Дали можете да станете руски државјанин ако склучите брак со Русин или Русинка?

• Ве очекуваме на Телеграм-каналот https://t.me/rb_makedonija
• Вклучете го во пребарувачот „Show notifications“ (дозволи известувања) за нашиот сајт!
• Пријавете се на нашата неделна мејлинг листа

Дали планирате да стапите во брак со руски државјанин или веќе сте го направиле тоа? Сега имате можност да добиете дозвола за престој во Русија, па дури и поедноставено државјанство. Ова е регулирано со Федералниот закон од 28 април 2023 година № 138-ФЗ „За државјанството на Руската Федерација“.

Каде и како треба да го регистрирате својот брак? 

Во Русија, само регистриран брак (не вонбрачна заедница) се смета за официјална заедница на маж и жена.

Ако сакате да го регистрирате вашиот брак во Русија, треба да се пријавите во локалната матична служба (ЗАГС). Сите документи на странски јазик мора да бидат преведени на руски и заверени на нотар. Бракот можете да го пријавите и во дипломатското претставништво (конзулатот) на земјата од која сте. Тоа значи дека вашата врска ќе биде регулирана со законите на вашата земја.

И, се разбира, во Русија се признаваат и бракови регистрирани во странство. За да добиете државјанство, документацијата за склучувањето брак во друга држава мора да биде преведена на руски и заверена на нотар.

Како да добиете државјанство?

Во Русија постојат три фази за добивање државјанство: дозвола за престој, постојан престој и, конечно, државјанство. Во редовен случај, потребни се околу 10 години, но многу луѓе добиваат државјанство по поедноставен редослед. Бракот го скратува овој процес на пет години (или дури и помалку), но сепак треба да ги поминете сите фази. А тоа можете да го направите само во Русија.

Ќе треба да поднесете документи до локалните миграциски центри (на пример, тука е веб-адресата на московскиот центар mos.ru). За повеќе информации, можете да се обратите до кој било мултифункционален центар на државните служби („Мои документи“).

1 – Дозвола за престој (РВП - разрешение на временное проживание) е печат во вашиот пасош кој ви дава право да останете во Русија три години, да работите легално и да стекнете право на руско бесплатно здравствено осигурување. Во исто време, не можете да гласате на избори или да престојувате надвор од државата подолго од шест месеци во годината.

Можете да го поднесете барањето за оваа дозвола веднаш по склучувањето на бракот, но само во рускиот регион каде што е регистриран вашиот брачен другар од Русија. Ќе мора да полагате и испити по руски јазик, да поминете лекарска комисија и да дадете отпечатоци од прсти. Периодот на издавање на таква дозвола не е подолг од четири месеци.

2 – Втората фаза е постојан престој, кој доаѓа во вид на сина книшка слична на пасош наречена вид на жительство, скратено ВНЖ. Тоа ви дава право да живеете и работите во Русија пет години, со можност да влегувате и излегувате од Русија без виза. Во исто време, не можете да ја напуштите земјата подолго од шест месеци, во спротивно документот ќе ви биде поништен. ВНЖ може да се обновува неограничен број пати.

За да добиете постојан престој, ќе морате да живеете во Русија најмалку една година континуирано со дозвола за престој (РВП). И може да се добие во кој било регион на земјата, не само таму каде што сте ја добиле дозволата за престој.

3 - Третата фаза - добивање државјанство - е најтешка. За таа цел, во нормален случај, потребно е да живеете во Русија најмалку пет години со постојан престој и не можете да ја напуштите Русија подолго од три месеци во текот на годината, инаку годината нема да се смета.

За странец што е оженет, доволно е да живее во Русија само три години (за разлика од петте години споменати претходно). Барањето за државјанство на Русија во овој случај се разгледува до три месеци. По добивањето руски пасош нема ограничувања за влез и излез од земјата, како и за сите други граѓани на Руската Федерација.

Дали треба да се откажете од државјанството на вашата матична земја?

Ова зависи од законот на вашата земја. Во некои земји е можно да се има само едно државјанство. Во Русија веќе не е забрането да имате второ државјанство, односно не мора да се откажете од првиот пасош. Русија ќе ве смета само за свој државјанин и ќе ги имате истите обврски како и другите руски граѓани (вклучувајќи служење воен рок, плаќање даноци и слично). 

Што е со децата?

Дете родено во семејство со најмалку еден руски државјанин автоматски добива руско државјанство. За разлика од возрасните, дете (до 18 години) може да добие руско државјанство дури и во странство во конзулатот.

Ако детето на руски државјанин е постаро од 18 години и сè уште нема руско државјанство, треба да ја посети Русија и да ги помине сите три фази за добивање државјанство, иако тоа сепак ќе биде по поедноставена постапка.